Shqipëria do të dalë në vitin 2022 në tregjet kapitale duke emetuar një Eurobond me vlerë 500 milionë euro. Nëse vendi ynë arrin të sigurojë një borxh me maturim 10 vjeçar kjo do të jetë hera e parë që merr një kohëzgjatje të kësaj natyre për një borxh në tregjet e kapitalit. Kjo u tentua edhe në eurobondin e katërt që ishte në vitin 2020, por maturimi i arritur ishte ai 7 vjeçar. Në dokumentin e Financave sqarohet se bankat menaxhuese, që do të udhëheqin procesin, do të jenë përgjegjëse për emetimin në tregjet e kapitalit të eurobondit. Këto të fundit do të jenë përgjegjëse gjithashtu për përgatitjen e transaksionit dhe rekomandimet, si dhe për strategjinë e marketingut dhe shpërndarjen. Palët që do të jenë të interesuara të veprojnë si menaxherë të qeverisë për eurobondin do të duhet të dorëzojnë ofertat deri më 26 korrik. Referuar monitor, kjo është hera e pestë që Shqipëria pritet të dalë në tregjet e kapitalit. Dalja e parë në tregjet financiare ka qenë në vitin 2010, kur Shqipëria mori një eurobond me vlerë 300 milionë euro si dhe arriti të siguronte një interes në kupon fiks prej 7.5% dhe afat maturimi 5-vjeçar. Interesi më i lartë justifikohej në atë kohë, për shkak se Shqipëria nuk kishte një profil në tregjet e kapitalit.