Zëvendës Ndihmës Sekretari i Shtetit i SHBA për Çështjet Europiane dhe Euroaziatike dhe i Dërguari i Posaçëm për Ballkanin Perëndimor Gabriel Escobar do të zhvillojë vizitën e tij të parë në Shqipëri, më datë 9 dhjetor me qëllimin për të thelluar miqësinë tonë të ngushtë, të mbështetur në vlerat e përbashkëta demokratike. Lajmi u bë me dije nga ambasada amerikane në Tiranë, ku përmes një njoftimi në mediat sociale ka zbuluar axhendën e Escobar. Në njoftim bëhet me dije se Escobar do të takohet me Kryeministrin Edi Rama, Ministren për punët e Jashtme Olta Xhaçka, Kryetarin e Partisë Demokratike Basha dhe udhëheqës të tjerë për të rikonfirmuar mbështetjen e palëkundur të Shteteve të Bashkuara për demokracinë e Shqipërisë, integrimin në BE, bashkëpunim më të fortë në mbrojtje dhe mundësi për tregti e investime. Nga ana tjetër, ashtu siç edhe shkruhet në Urdhrat Ekzekutivë të Presidentit Biden, Escobar do të diskutojë gjithashtu edhe mbi vendosmërinë e Shteteve të Bashkuara për të luftuar korrupsionin, pandëshkueshmërinë dhe përpjekjet për të minuar demokracinë në Ballkanin Perëndimor, përfundon njoftimi I ambasadës amerikane.