Departamenti i Drejtësisë i Shteteve të Bashkuara të Amerikës ka konfirmuar se do të hetojë lidhjet e dyshuara të financierit pedofil Jeffrey Epstein me banka të mëdha dhe disa demokratë të shquar, përfshirë këtu ish-Presidentin Bill Clinton. Presidenti i SHBA-së Donald Trump tha më herët se do t'i kërkonte Prokurores së Përgjithshme Pam Bondi dhe FBI-së të hetonin "përfshirjen dhe marrëdhënien" e Epstein me Clinton dhe të tjerë. Bondi tha se departamenti "do ta ndjekë këtë me urgjencë dhe integritet". Kërkesa e Trump erdhi disa ditë pasi mijëra email-e të Epstein u publikuan nga Kongresi i SHBA-së, ku përmendet edhe presidenti amerikan. Demokratët e kanë akuzuar Trump se po përpiqet të shmangë pyetjet në lidhje me marrëdhënien e tij me Epstein. Email-et, të publikuara nga Komiteti Mbikëqyrës i Dhomës së Përfaqësuesve të SHBA-së, përfshijnë shumë figura të profilit të lartë. Një shqyrtim nga Ëall Street Journal zbuloi se Trump përmendet në më shumë se 1600 mesazhe të postës elektronike të Epstein. Përveç Clinton, Trump tha se i kërkoi Departamentit të Drejtësisë të hetojë edhe bankën JP Morgan, ish-Sekretarin e Thesarit, Larry Summers dhe themeluesin e LinkedIn Reid Hoffman.