Enver Sheshi ndërroi jetë më 8 janar të këtij viti, pasi SPAK dhe gjykatat e posaçme i refuzuan kërkesat për zbutje të masës së sigurisë për arsye shëndetësore. Megjithatë, edhe pas vdekjes as prokuroria dhe as gjykata e posaçme nuk i ka pushuar akuzat që ka ngritur ndaj tij në hetimet për inceneratorin e Fierit, por përmes një shkrese të publikuar në Facebook nga gazetarja Anila Hoxha u kërkon familjarëve të të ndjerit që të paraqiten në gjykatë. Mospushimi i çështjes, jo vetëm është në kuadrin e absurdit po ngre dyshime edhe mbi respektimin e kuadrit ligjor në Shqipëri, ku në dy raste parashikohet pushimi i akuzave. Rasti i parë është nëse i akuzuari ndërron jetë dhe rasti i dytë nëse për të njëjtën vepër e të njëtin fakt i akuzuari është gjykuar njëherë. Enver Sheshi, përveçse ka ndërruar jetë është hetuar e gjykuar një herë për të njëjtat akuza dhe me të njëjtat prova, ku gjykata ka dhënë vendim të formës së prerë.