Elbasani është një prej 4 zonave me kriminalitetin më të lartë në vend. Kjo tashmë është thuajse zyrtare, kur artikulohet edhe nga vetë kryeprokurori Olsian Çela, që e krahason Elbasanin me Siçilinë e viteve ’70-80. Prej javësh Elbasani është kthyer në kryefjalë e të gjitha lajmeve të kronikës së zezë. Në hartë pas Elbasanit me shifra të larta të kriminalitetit janë Shkodra, Tirana e Vlora. Por, për shefin e hetimeve shqiptare, kryeqendra e Shqipërisë së mesme është problemi më i mprehtë dhe që kërkon zgjidhje radikale, për të mos lejuar kthimin e saj në Siçilinë e 5 dekadave më parë. Në një farë mënyre kjo do të thotë se në ditët e sotme, pra në vitin 2020, Siçilia ka ndryshuar shumë dhe është “riedukuar”. Ndërsa Elbasani ka marrë huqet e saj të 50 viteve më parë. Pas ditëve relaksuese të pandemisë dhe karantinës së detyruar, krimi pati një rritje të menjëhershme. Prej asaj kohe qetësia quhet e prishur dhe herë pas here rendi kërcënohet nga aktet terroriste. E njëjta gjë po ndodh edhe me Shqipërinë. Edhe pse Tirana nuk është më pak me kriminalitet për autoritetet e hetimit, Elbasani është Siçilia.