Greqia është tronditur mëngjesin e kësaj të hëne nga një vrasje mafioze. Bëhet e ditur se persona të paidentifikuar ekzekutuan një personazh të njohur të botës së krimit. Sipas mediave greke, bëhet fjalë për Evangelos Pallis, i njohur ndryshe edhe si “Apashi”, i cili është dënuar të paktën dy herë për vrasje dhe që ka luajtur një rol të rëndësishëm në kryengritjet në burgjet greke gjatë viteve 2000. “Apashi” njihet si personazh që merrte porosi për vrasje me pagesë të emrave të njohur të krimit në Greqi. Ai u gjet i mbuluar në gjak nga kalimtarët e rastit, të cilët njoftuan policinë dhe autoambulancën. Vrasja e tij me tre plumba ndodhi dy vite pasi ishte liruar nga burgu. Ai u lirua përmes procedurave të drejtësisë greke, ndërsa për njërin krim provat u zhdukën dhe në atë kohë pati mjaft debate në Greqi. Gjithsesi, duket se hakmarrja ka qenë motivi për aktin mafioz të mëngjesin të kësaj të hëne.