Sipas të dhënave zyrtare pandemia e koronavirusit nuk ka pasur efekte shumë negative mbi tregtinë me pakicë. Sipas INSTAT, në tremujorin e dytë të viti 2020, shitjet në volum në tregtinë me pakicë janë ulur 8,3 %, krahasuar me të njëjtën periudhë të vitit 2019, ndërsa krahasuar me tremujorin e parë të po këtij viti, ky tregues ka pësuar rënie 6,0 %. Duhet theksuar se bëhet fjalë për periudhën prill-qershor në një kohë që pjesa më e madhe e njësive të tregtisë dhe shërbimeve ishin të mbyllura përgjatë dy muajve prill dhe maj. Por, kjo shifër në rënie është akoma më e vogël, pa përfshirë këtu tregtinë me pakicë të hidrokarbureve, e cila në kohën e mbylljes së plotë të qarkullimit të makinave ka pësuar rënien më të madhe. Kështu, pa tregtinë me pakicë të hidrokarbureve, volumi i shitjeve në tremujorin e dytë 2020 ka pësuar rënie prej 4,5 %, kundrejt tremujorit të dytë të vitit 2019.