Ka kaluar një muaj e 40 ditë që kur Arben Ahmetaj është marrë zyrtarisht i pandehur nga SPAK me katër akuza, përfshirë këtu edhe atë për korrupsion. Hapi i parë procedurial që SPAK duhet të ndërmerrte pas zyrtarizimit të akuzës ishte dërgimi në Kuvend i kërkesës për heqjen e imunitetit të deputetit. Një kërkesë e tillë nuk ka mbërritur ende zyrtarisht në Kuvend edhe pse gjykatat e posaçme u kanë dhënë të drejtë prokurorëve për ligjshmërinë e operacioneve të kontrolleve në vilën në Gjirin e Lalzit, në emër të partneres së Arben Ahmetajt dhe atë të Palasës, që të dyja prona të vendosura nën sekuestro preventive. Nuk dihet pse kërkesa e heqjes së imunitetit s’është dorëzuar në Kuvend. Ajo që publiku di në këtë fazë të hetimeve është që Arben Ahmetaj është marrë i pandehur për korrupsion, shpërdorim detyre, fshehje pasurie dhe pastrim të produkteve të veprës penale. Kontrolli u kundërshtua nga Ahmetaj, që në gjykatë kërkoi pavlefshmërinë e tyre me pretendimin se imuniteti i deputetit e mbronte nga këto kontrolle.