Një oficer policie është pezulluar pasi një video qarkulloi në internet ku një burrë goditet me shkelma në kokë në aeroportin e Mançesterit. Policia e Mançesterit konfirmoi se një oficer ishte pezulluar nga të gjitha detyrat pas një "shqyrtimi të informacionit" të incidentit, i cili ndodhi të martën. Pamjet treguan një oficer policie, me uniformë, që godiste një person të shtrirë në tokë. Kryebashkiaku i Mançesterit, Andy Burnham bëri apel për qetësi pasi pamjet shkaktuan protesta jashtë stacionit të policisë në Rochdale. Policia e Mançesterit tha se e kuptonte shqetësimin e njerëzve. Në lidhje me incidentin e treguar në klip, një zëdhënës i policisë tha se oficerët ishin goditur me grushte pasi ishin përpjekur ta arrestonin personin, pas një përleshjeje në aeroport. Kishte një "rrezik të qartë" se atyre mund tu merreshin armët, tha zëdhënësi i policisë, duke shtuar se të tre persona ishin dërguar në spital, njëri me hundë të thyer. Katër persona ndërkohë u arrestuan për sulm dhe grindje. Kryebashkiaku Burnham tha se videoja ishte shumë shqetësuese dhe pezullimi i oficerit ishte veprim i duhur. Megjithatë ai shtoi se ai kishte parë pamjet e plota që tregonin një situatë të zhvilluar shpejt. Ai nënvizoi se një hetim ka nisur për të zbardhur cdo detaj të ngjarjes. Ndërkohë ka reagime sipas të cilave veprimet e policisë ishin të tmerrshme dhe të panevojshme dhe se racizmi ka luajtur rol në incident.