Dy raste me simptoma të ngjashme të variantit të ri Delta dyshohet se janë identifikuar në qarkun e Gjirokastrës. Bëhet fjalë për një studentë të ardhur nga jashtë vendit një ditë më parë, nga fshati Asim Zeneli, e cila ka shfaqur komplikacione dhe simptoma te ngjashme me atë te variantit indian te virusit Corona. Ndërsa rasti i dytë është shënuar në Përmet te një 45-vjeçar, i cili kishte ardhur nga jashtë. Të dy rastet trajtohen në regjim shtëpiak dhe deri tani gjendja e tyre shëndetësore është e stabilizuar, ndërkohë që pritet përgjigja e analizave nga Anglia. Por pas publikimit të dy rasteve të dyshuara, Instituti i Shëndetit publik përmes një reagimi ka mohuar praninë e variantit Indian në vendin tonë. “Pavarësisht numrit të lartë të testimeve, nuk kemi sinjale për prezencën e këtij varianti në vendin tonë. Instituti i Shëndetit Publik po monitoron me kujdes situatën e epidemisë së Covid19 në vend dhe për çdo rast të dyshuar, do të bashkëpunojë me institucionet e referencës, gjë e cila është pjesë e praktikës së punës së këtij institucioni", thuhet në reagimin e ISHP-së.