Vaksinimi kundër covid 19 dhe gara e ethshme mes shteteve të ndryshme në mbarë botën për sigurimin e tyre, janë sot tema më e debatuar në gjithë botën.Në vendin tonë ky proces po mbush gati 3 muaj nga nisja e tij, dhe prej 11 ditësh ka filluar vaksinimi masiv i popullatës pas mbërritjes së 192 mijë dozave të vaksinave kineze Sinovac. Sipas një bilanci të publikuar mbrëmjen e së martës nga ministria e Shendetësisë, që nga fillimi i procesit janë kryer në total 206 708 doza vaksinash, nga të cilat 35 588 për personelin shëndetësor 4370 doza për punonjësit e policisë dhe gazetarët si dhe 141 631 vaksinime për të moshuarit. Në total me gjithë vaksinat e fundit të mbërritura dy ditë më parë nga kompania Pfizer, Shqipëria disponon mbi 290 mijë doza anticovid për imunizimin e popullatës. Në përdorim janë vaksina Pfizer, e siguruar nga kontrata me kompaninë amerikane, Astrazeneca mbërritur përmes mekanzimit covax, 10 mijë vaksinat ruse Sputnik V, dhurata e Princit të kurorës të Emirateve të Bashkuara, si dhe vaksina kineze Sinovac.