Të paktën 103 persona kanë humbur jetën në qytetin Kerman, në Iranin juglindor, pas dy shpërthimesh të ndodhura në një varrezë ku prehet edhe trupi i Qasem Soleimanit, ish-kreu i Gardës Revolucionare të Iranit. Shpërthimet ndodhën mesditën e të mërkurës, me një distancë prej 10 minutash nga njëri-tjetri, në një kohë kur në varrezë ishin mbledhur turmna të mëdha njerëzish me rastin e përvjetorit të katërt të vrasjes së Soleimanit. Televizioni shtetëror Iranian tha se bëhej fjalë për dy shpërthime të telekomanduara, teksa në video shfaqen edhe punonjësit e shpëtimit të Gjysmëhënës së Kuqe, që po kujdeseshin për të plagosurit. "Ekipet tona të reagimit të shpejtë po evakuojnë të plagosurit... Por ka turma që bllokojnë rrugët dhe është shumë e vështirë lëvizja e autoambulancave" i tha televizionit shtetëror Reza Fallah, kreu i Gjysmëhënës së Kuqe në provincën Kerman. Qasem Soleimani u vra në janar të 2020-ës, në moshën 62-vjeçare, gjatë një sulmi me dron amerikan në Irak. Ai ishte një figurë kyçe në regjimin iranian dhe gjithashtu një nga figurat publike më të njohura në vend. Pamjet: AFP