Policia e Vlorës ka parandaluar dy konflikte të rënda duke shmangur përshkallëzimin e tyre në pasoja më të rënda. Pas ndërhyrjes nga forcat e rendit, janë arrestuar në flagrancë dy persona të dyshuar si autorë të plagosjes së rëndë të dy shtetasve, në dy ngjarje të ndryshme. Të dy rastet janë shënuar pasditen e së mërkurës. Në lagjen “Kushtrimi”, rreth orës 19:30, një 23 vjeçar ka goditur me levë hekuri në kokë një shtetas tjetër pas një konflikti për motive të dobëta. Bëhet me dije se i plagosuri ndodhet jashtë rrezikut për jetën nën kujdesin e mjekëve. Vetëm pak minuta më vonë, rreth orës 19:45 në lagjen “Uji i Ftohtë”, një 56 vjeçar, ka plagosur me thikë një 64 vjeçar, gjithashtu pas një konflikti për motive të dobëta. Edhe ky i fundit është jashtë rrezikut për jetën. Të dy të arrestuarit do të përballen me akuzat për plagosje të rëndë me dashje, ndërsa për 56 vjeçari dhe për mbajtje pa leje e armëve të ftohta.