Policia shqiptare në bashkëpunim me homologët finlandezë dhe interpolin e të dyja vendeve, kanë prangosur dy shtetas finlandezë të shpallur në kërkim ndërkombëtar që akuzohen për trafik lëndësh narkotike. Aksioni policor ndërkombëtar me emrin e koduar Manhunt, u krye në Shëngjin të lezhës dhe tani dy të arrestuarit do të ekstradohen. “Falë bashkëpunimit dhe shkëmbimit të informacionit në kohë, ndërmjet FAST Albania dhe FAST Finland, për vendndodhjen e dy shtetasve finlandez në kërkim ndërkombëtar, është organizuar dhe finalizuar operacioni policor ndërkombëtar i koduar "Manhunt". Si rezultat i këtij operacioni, në Shëngjin, Lezhë, u bë e mundur kapja dy shtetasve, 30 dhe 32 vjec, të dy banues në Finlandë”, thuhet në njoftimin për shtyp. Sipas njoftimit, interpol Tirana po punon me autoritetet finlandeze për të finalizuar ekstradimin e tyre drejt Finlandës. Për policinë shqiptare, operacioni Manhunt tregoi rëndësinë e strukturës Fast Albania, e cila sic thuhet në deklaratë, ka kapacitetin dhe aftësinë për të vepruar si e barabartë me homologët e saj.