Partia Demokratike shënoi këtë të hënë 33 vjetorin e themelimit të saj, përvjetor ky që e gjeti atë sërish të përçarë. Sali Berisha zgjodhi një nga hotelet e kryeqytetit për të festuar këtë përvjetor me demokratët, ndërsa Lulzim Basha, i rikthyer në krye të PD-së, nga ku nuk u largua asnjëherë juridikisht edhe pse u dorëhoq publikisht, zgjodhi sallën e Pallatit të Kongreseve, si për të treguar se vijon të ketë pas vetes mbështetës, ndonëse deputetë janë më pak se gishtat e duarve. Por ky përvjetor u përdor edhe për sulme ndaj njëri tjetrit, teksa ish-kryeministri e konsideroi udhëheqjen e Bashës nga 2013, si një udhëheqje pazaresh. E nga ana tjetër, Lulzim Basha, pa përmendur emra kritikoi ata që i kanë dalë kundër, me në krye Sali Berishën, që sipas tij po bën gjithçka për shkak të frikës ndaj SPAK.