Zyrtarët e lartë amerikanë dhe ukrainas përfunduan takimet e tyre në Florida, që Sekretari amerikan i Shtetit, Marco Rubio i përshkroi si “shumë produktive”, ndonëse nevojitet punë shtesë për të finalizuar një plan për përfundim të luftës së Rusisë në Ukrainë. “Kemi pasur një tjetër takim shumë produktiv, nisur nga bisedimet në Gjenevë, më pas do kemi edhe takime të tjera gjatë javës, por duhet bërë më shumë punë”, u tha Rubio gazetarëve pas takimit, por pa ofruar më shumë hollësi. “Ka shumë gjëra që po ndryshojnë, dhe natyrisht që është edhe një palë tjetër e përfshirë këtu që duhet të jetë pjesë e ekuacionit”, tha ai, duke iu referuar Rusisë. “Do të vazhdojmë edhe këtë javë takimet, i dërguari i posaçëm i Shtëpisë së Bardhë, Steve Ëitkoff udhëton për në Moskë. Ne kemi qenë në kontakt me nivele të ndryshme brenda palës ruse dhe duket se i kuptojmë mirë edhe qëndrimet e tyre”, tha Rubio. Sekretari i Këshillit të Sigurisë të Ukrainës, njëherësh lideri i delegacionit të Kievit, Rustem Umerov, i ka përshkruar negociatat si “të suksesshme” por as ai nuk ofroi më shumë hollësi. “Përfunduam një takim të vështirë por produktiv të negociatave në Florida. Kemi shënuar përparim të prekshëm drejt arritjes së paqes”, shkroi ai në Telegram. Agjencia e lajmeve AFP ka cituar disa burime të pakonfirmuara brenda ekipit ukrainas të thonë se bisedimet “nuk kanë qenë të lehta” dhe që “kërkimi për formulime dhe zgjidhje vazhdon”. Ekipi negociator u takua në Florida në mesin e përpjekjeve për të arritur dakordësi për një plan që do të ishte i pranueshëm si për Kievin, ashtu edhe për Moskën. Ndërkohë, presidenti ukrainas, Volodimir Zelenski shkroi në rrjetet sociale se “pala amerikane po tregon qasje konstruktive dhe në ditët në vijim është e mundur që do të përcaktohen hapat për një përfundim me dinjitet të luftës”.