Presidenti amerikan, Donald Trump, shfrytëzoi fjalimin më të gjatë para kombit në historinë e Shteteve të Bashkuara për të përsëritur kërcënimin për veprim ushtarak kundër Iranit nëse diplomacia dështon dhe për t’u zotuar se do të vazhdojë negociatat për t’i dhënë fund luftës në Ukrainë. Duke folur për gati 1 orë e 50 minuta, Trump përdori seancën e përbashkët të Kongresit amerikan për të paraqitur arritjet e administratës së tij, duke i cilësuar ato si agim i një “epoke të artë”. Trump i kushtoi disa minuta Iranit duke rikujtuar sulmet ushtarake të SHBA-së ndaj këtij vendi në qershor të vitit të kaluar. “Pas operacionit, ata u paralajmëruan që të mos bënin përpjekje të reja për të rindërtuar programin e tyre të armëve, veçanërisht atë të armëve bërthamore. Megjithatë, ata vazhdojnë të nisin gjithçka nga e para. Unë preferoj që ta zgjidh këtë problem përmes diplomacisë, por, një gjë është e sigurt: Unë kurrë nuk do të lejoj sponsorin numër një në botë të terrorit, që të ketë armë bërthamore. Asnjë komb nuk duhet të dyshojë ndonjëherë në vendosmërinë e Amerikës. Ne kemi ushtrinë më të fuqishme në Tokë”