Avionët luftarakë turq F-16 interceptuan dhe shkatërruan një mjet ajror pa pilot të hënën, pasi ai hyri në hapësirën ajrore turke nga Deti i Zi, tha Ministria e Mbrojtjes së vendit. Droni u rrëzua pranë Çankırı-t, afërsisht 120 kilometra larg Ankarasë, pasi dukej se ishte jashtë kontrollit. Të premten, autoritetet gjetën një dron të rrëzuar në Kocaeli, rreth 30 kilometra në jug të Stambollit. Ministria e Brendshme tha se të dhënat fillestare tregojnë se droni është një lloj Orlan-10 i prodhuar në Rusi, i përdorur për qëllime zbulimi dhe mbikëqyrjeje. Një dron i dytë i rrëzuar u zbulua të shtunën në një fushë pranë Balıkesirit, rreth tre orë në jugperëndim të Stambollit, raportuan mediat turke. Fermerët gjetën dronin dhe ua dorëzuan autoriteteve, të cilët e transportuan në Ankara për analiza. Origjina e këtij droni mbetet nën hetim. "Për shkak të luftës që vazhdon, të dyja vendet, si ukraina ashtu edhe rusia janë paralajmëruar se duhet të jenë më të kujdesshme në lidhje me aktivitete të tilla", tha ministria. Incidentet me dronë vijnë mes sulmeve në rritje ndaj anijeve në Detin e Zi, duke përfshirë disa që i përkisnin kompanive turke. Në fund të nëntorit, forcat ukrainase goditën dy cisterna të identifikuara si pjesë e flotës hije të Rusisë në Detin e Zi pranë bregdetit të Turqisë. Ekipet turke të shpëtimit evakuuan anëtarët e ekuipazhit nga të dyja anijet. Në fillim të dhjetorit, cisterna Midvolga-2, që transportonte vaj luledielli nga Rusia në Gjeorgji, u sulmua rreth 130 kilometra larg bregdetit turk.