Një 37-vjeçar ka rënë në prangat e policisë së Fierit, pasi gjatë kontrollit të policisë është kapur me doza hashashi. Sakaq është shpallur në kërkim babai i tij. Gjatë kontrollit fizik dhe të automjetit që 37-vjeçari drejtonte, shërbimet e Policisë kanë gjetur doza të lëndës së dyshuar narkotike kanabis sativa. Pas kësaj policia ka ushtruar kontroll dhe në banesën e tij, ku ka zbuluar një sasi lënde të dyshuar narkotike kanabis sativa, 12 fishekë arme gjahu, 3 gërshërë që shërbenin për të përgatitur lëndën narkotike, një shumë parash prej 2 milionë lekë dhe 700 euro, të cilat u sekuestruan në cilësinë e provës materiale bashkë me 5 celularë, që dyshohet të jenë përfituar nga kjo veprimtari kriminale. Operacioni policor i koduar “Peshtani” u zhvillua nga specialistët për Hetimin e Narkotikëve të Drejtoria Vendore e Policisë Fier, në kuadër të kontrolleve për parandalimin e shitjes së lëndëve narkotike, në bashkëpunim me shërbimet e Forcat Shqiponja.