Sali Berisha thotë se grupi i punës që ka ngritur për faktimin e krimit monstruoz, që sipas tij u krye në zgjedhjet e 14 majit ka mbledhur prova të pakundërshtueshme. SALI BERISHA – Një komision i ngritur po punon me intensitet dhe unë dua të falënderoj të gjithë ata, drejtues, anëtarë, simpatizantë, vëzhgues, komisionerë, kandidatë, që po kontribuojnë në denoncimin e krimit monstruoz elektoral, të farsës 14 maj 2023. Sipas Berishës, dokumentet faktojnë se në Shkodër u bashkuan bandat me armiqësinë më të egër ndaj njëra-tjetrës. Ai thotë se bandat ishin një shkrirje me bandat e qeverisë dhe se inxhinierë, drejtorë, punonjës, kanë ushtruar terror ndaj qytetarëve me kërcënimin: votën ose jetën! Berisha akuzon se shumë qytetarë nuk u lejuan që të votojnë, sepse e morën fletën e mbushur nga komisionerët. Ish-Kryeministri foli për një dosje voluminoze, që do të trajtohet me seriozitetin dhe vërtetësinë më të madhe.