Prokuroria e Posaçme, SPAK ka dërguar për gjykim 31 anëtarët e katër grupeve kriminale, të cilët u gjurmuan e u evidentuan nga hetimet e operacionit të koduar ‘Shpirti’. Veprimtaria e këtyre shtetasve në vendin tonë është shtrirë në harkun kohor të pesë viteve, duke filluar nga 2014-ta. Autoritetet shqiptare në bashkëpunim me homologët italianë, zbuluan gjithë “zinxhirin e prodhimit” të lëndës narkotike që nga kultivimi, prodhimi, mbledhja, magazinimi dhe trafikimi në drejtim të brigjeve pugliese nëpërmjet mjeteve lundruese. 31 emrat e kësaj dosjeje u evidentuan nga përgjimet sekrete si dhe nga dëshmia e katër bashkëpunëtorëve të drejtësisë. Ndër emrat e çuar për gjykim, bien në sy edhe katër funksionarë të shtetit, një prej tyre prokurori Maksim Sota dhe më pas, Ilirjan Balla, Artur Krasniqi dhe Festim Lelaj. Duke shfrytëzuar pozitën e lartë në shtet, katër zyrtarë janë bërë mburojë mbrojtëse për aktivitetin kriminal të mirëorganizuar duke shpërdoruar në mënyrë flagrante detyrën.