Një zyrtar i lartë politik i Hamasit i tha Associated Press se grupi militant islamik është i gatshëm të bjerë dakord për një armëpushim prej pesë vjetësh ose më shumë, me Izraelin, dhe se do të dorëzonte armët për tu shndërruar në një parti politike nëse një shtet i pavarur palestinez krijohet përgjatë kufijve që ekzistonin para vitit 1967. Komentet e Khalil al-Hayya në një intervistë të mërkurën erdhën në mes të një ngërçi në bisedfimet për një armëpushim në Gaza, muajt e fundit. Sugjerimi se Hamasi do të çarmatosej dukej se ishte një lëshim i rëndësishëm nga grupi militant i angazhuar zyrtarisht për shkatërrimin e Izraelit. Por nuk ka gjasa që Izraeli ta marrë në konsideratë një skenar të tillë. Netanyahu është zotuar të shtypë Hamasin pas sulmeve vdekjeprurëse të 7 tetorit, që shkaktuan luftën, dhe kundërshton po ashtu me forcë krijimin e një shteti palestinez në tokat e pushtuara nga Izraeli në luftën e Lindjes së Mesme të vitit 1967. Al-Hayya, një zyrtar i lartë i Hamasit, i cili ka përfaqësuar militantët palestinezë në negociatat për një armëpushim dhe shkëmbim pengjesh, pa patur herë herë tone sfiduese, dhe herë të tjera tone pajtuese. Duke folur për Asociated Press në Stamboll, Al-Hayya tha se Hamasi dëshiron t'i bashkohet Organizatës për Çlirimin e Palestinës, të kryesuar nga fraksioni rival Fatah, për të formuar një qeveri të bashkuar për Gazën dhe Bregun Perëndimor. Ai tha se Hamasi do të pranonte "një shtet plotësisht sovran palestinez në Bregun Perëndimor dhe Rripin e Gazës dhe kthimin e refugjatëve palestinezë në përputhje me rezolutat ndërkombëtare", përgjatë kufijve të para vitit 1967. Nëse kjo ndodh, tha ai, krahu ushtarak i grupit do të shpërbëhet.