Perëndimi do ta humbasë Serbinë nëse nuk e anëtarëson sa më shpejt në Bashkimin Europian. Ky është paralajmërimi i dhënë nga Kryeministri hungarez, Viktor Orban. “Serbia duhet të hyjë sa më shpejt në Bashkimin Europian, përndryshe Beogradi do të zgjedhë bashkëpunimin me partnerët e tjerë dhe Brukseli do ta humbasë këtë vend”, tha ai. "Ne duhet të përfundojmë detyrën e vjetër të zgjerimit para se të fillojmë zgjerimin e ri me Ukrainën. Nëse nuk e integrojmë Serbinë sa më shpejt të jetë e mundur, do ta humbasim atë. Serbia ka mundësi të tjera zgjedhjeje. Sapo ka përfunduar një marrëveshje të tregtisë së lirë me Kinën", tha kryeministri hungarez për gazetën austriake "Presse". Kryeministri hungarez e quajti gjithashtu zgjerimin e BE-së me vendet e Ballkanit Perëndimor një "prioritet kryesor" për Budapestin gjatë presidencës së Këshillit të Bashkimit Europian, që e fillon më 1 korrik.