Shtëpia e Bardhë tha se bisedimet në Gjenevë me Kievin shënuan “përparim domethënës” drejt përfundimit të luftës në Ukrainë dhe kanë rezultuar me një kornizë “të përditësuar dhe ridefinuar” që parashikon sovranitetin e plotë të Ukrainës dhe arritjen e paqes. Në një deklaratë të lëshuar nga Uashingtoni nuk janë përmendur specifika të ndryshimeve që janë bërë në planin e paqes prej 28 pikash që është prezantuar nga presidenti amerikan, Donald Trump dhe që është kritikuar nga mbështetësit e Kievit, të cilët e kanë konsideruar dokumentin shumë miqësor për Rusinë. Propozimi amerikan raportohej se përfshinte edhe zvogëlimin e numrit të forcave të armatosura ukrainase dhe njëkohësisht zvogëlim të ndihmës ushtarake nga Shtetet e Bashkuara, e cila ka qenë thelbësore në luftën e Ukrainës kundër ushtrisë ruse. “Bisedimet kanë qenë konstruktive, të fokusuara, të zhvilluara me respekt dhe nënvizojnë përkushtimin e përbashkët për të arritur paqe afatgjatë”, thuhej në deklaratën e përbashkët të lëshuar nga Shtetet e Bashkuara dhe Ukraina. “Diskutimet shënojnë përparim domethënës drejt përafrimit të pozicioneve dhe identifikim të hapave të ardhshëm”. “Në bisedime është bërë e qartë se çdo marrëveshje në të ardhmen duhet të mbrojë sovranitetin e Ukrainës dhe të përcaktojë vetëm paqe të qëndrueshme. Si rezultat i diskutimeve, palët kanë përpiluar një kornizë të përditësuar”, thuhej në deklaratë, pa dhënë më shumë hollësi. Në deklaratë thuhet edhe se palët janë pajtuar “të jenë në kontakt të ngushtë me partnerët evropianë” të cilët mbeten disa prej mbështetësve më të fuqishëm të Ukrainës. Vetë Trump nuk ka bërë ndonjë koment pas takimit.