Një 36-vjeçar shqiptar, me precedentë të rëndë penalë, ra në prangat e policisë greke, pasi u arrestua në flagrancë teksa tentonte të hynte për të grabitur një shtëpi. Në posedim të tij u gjet armë, ndërsa autoritetet po hetojnë lidhjet e tij, si dhe përfshirjen e mundshme të ish-partnerit të tij në një organizatë terroriste. 36-vjeçari me banim në Pire, sipas policisë, është ndër kriminelët “e ashpër”. Ai u arrestua nga Departamenti i Hetimit të Krimit në tentativë për të vjedhur një shtëpi në Longos. Gjatë kontrollit në kopshtin e shtëpisë, policia gjeti një pistoletë të mbushur, të cilën autori e kishte fshehur në një kondicioner të jashtëm përpara se të arrestohej. Sipas autoriteteve, objektivi i 36-vjeçarit ka qenë një banesë fqinje, për të cilën, siç ka rrëfyer, kishte informacione nga një punëtor shqiptar se fshihej një shumë e madhe parash, që shkonte në 1 milion euro. Autoritetet po hetojnë gjithashtu rolin e ish-partnerit të tij, i cili thuhet se është anëtar i organizatës terroriste "Konspiracioni i Celulave të Zjarrit".