Kongresi amerikan do të mblidhet për të certifikuar fitoren e Donald Trump në zgjedhjet presidenciale të nëntorit, përballë zëvendëspresidentes aktuale, Kamala Harris. Zëvendëspresidentja është përgjegjëse për kryesimin e numërimit të rezultateve nga secili prej 50 shteteve të vendit, cka e detyron Harrisin të certifikojë humbjen e saj. Procedura ishte për një kohë të gjatë një formalitet në procesin zgjedhor, por katër vjet më parë u shndërrua në kaos pasi mbështetësit e Trumpit hynë në Kapitol, duke plagosur rreth 140 oficerë policie, duke shkaktuar dëme në ndërtesë dhe duke detyruar ligjvënësit të largoheshin në panik duke kërkuar një vend të sigurt. Skena të ngjashme nuk priten të hënën, duke qenë se Harris e ka pranuar humbjen dhe presidenti Joe Biden ka theksuar nevojën për një proces paqësor të kalimit të pushtetit. Autoritetet janë përgatitur për çdo rast, duke ngritur pengesa të larta metalike rreth kompleksit të Kapitol Hillit.