Ministria e Punëve të Jashtme të Serbisë i ka dërguar një notë proteste Ambasadës së Shqipërisë, duke dënuar ashpër djegien e flamurit kombëtar të Serbisë në Tiranë. Më 20 nëntor në rrjetet sociale dhe portale mediatike u shfaq një video ku shiheshin tifozët e futbollit në Tiranë duke djegur flamurin e Serbisë në sheshin Skënderbej. Për këtë arsye Ministria e Punëve të Jashtme i dërgoi një notë Ambasadës së Shqipërisë në Beograd. “Ne besojmë se ngjarje të tilla dëmtojnë marrëdhëniet dypalëshe të dy vendeve, të cilat në vitet e fundit kanë arritur pikën më të lartë gjatë historisë së tyre të përbashkët shekullore”, njoftoi Ministria e Punëve të Jashtme të Serbisë. Në deklaratë ndër të tjera thuhet se Ministria e Punëve të Jashtme e Republikës së Serbisë, në këtë frymë, pret që institucionet kompetente të Republikës së Shqipërisë të bëjnë gjithçka që është e mundur për identifikimin dhe ndjekjen penale të autorëve të atij akti, të cilët duken qartë në videon e publikuar.