Dy persona, mes tyre një ish-drejtues i repartit zjarrfikës dhe një mjek, janë dhunuar fizikisht mëngjesin e së martës në Ballsh dhe Mirditë. Në Ballsh, Armand Aliaj është sulmuar nga disa persona të maskuar, teksa ndodhej i vetëm në lokalin e tij. Ngjarja ka ndodhur rreth orës 07:00, kur autorët e kanë goditur me levë dhe më pas janë larguar me një automjet tip “Audi Q5”. Aliaj ka marrë ndihmën e parë në spitalin e Ballshit dhe më pas është transportuar në Spitalin Rajonal të Fierit për ekzaminime të mëtejshme. Ai ka deklaruar se nuk ka konflikte me persona të tjerë, ndërsa motivi i sulmit mbetet i paqartë. Ndërsa në fshatin Konaj të Mirditës, një 50-vjeçar me profesion mjek dyshohet se është dhunuar me mjete të forta gjatë një konflikti për motive të dobëta. Sipas Policisë, nga hetimet paraprake nuk rezulton që ngjarja të ketë lidhje me profesionin e tij. Në të dyja rastet, vijojnë hetimet për zbardhjen e plotë të rrethanave dhe identifikimin e autorëve.