Deputeti Dash Sula ka ironizuar kreun e PD pas ndryshimeve të statutit që u miratuan në mbledhjen e Këshillit Kombëtar. Në një postim në Facebook, Sula shkruan me ironi se gjithë këto vite paskan qenë lodhur kot për ta bërë kryeministër, pasi kreu i PD paska dashur vetëm që të bëhet kreu i grupit. “Asnjëherë nuk e humb mundësinë për tu bërë qesharak sa herë që del në publik. Si ka mundësi që i vetshpalluri lider perëndimor kërkon kufizim te mandatit te kreut të qeverisë por këtë praktik nuk e nis nga kryetari i partisë, madje e shmang nga çdo përgjegjësi për humbjen e zgjedhjeve’. Sakaq ka reaguar dhe deputeti tjetër demokrat Lefter Gështenja i cili shprehet se të bësh luftë kundër “kultit të individit e më pas të mbledhësh Kuvende për të përjashtuar ata që bëre betejën dhe të vetëshpallesh kryetar i përjetshëm, vetëm kjo s’mund të jetë dhe s’mund të quhet Partia Demokratike”. Sipas tij është koha për një Parti Demokratike gjithëpërfshirëse, më të fortë dhe jo më të dobët se e djeshmja. Kuvendi Kombëtar i Partisë Demokratike i cili pati një numër më të reduktuar delegatësh, rreth 1500 më pak, i miratoi të gjitha ndryshimet e propozuara në statutin e Partisë Demokratike.