Fiks Fare denoncoi mbrëmjen e së hënës një skandal më ndërtimin e një HEC-i, i cili zaptoi pronat e disa individëve. Dhe, për më tepër, pronat e qytetarëve që nuk ishin pjesë e projektit i vendosi kolateral duke marrë një kredi 3 milionë euro në një bankë të nivelit të dytë. Në redaksinë e emisionit Fiks Fare u ankua z.Kosta Kaishi, i cili tha se ka një pronë në afërsi të kryqëzimit të Kranesë, në Sarandë. Sinkron: "Pronën e kam blerë nga komiteti i Delvinës, tani e shfrytëzon centrali i Bistricës, e kanë mbuluar me gjëra të tjera. Është me të gjitha vendimet, me kontratat me të gjitha, e hipotekuar. Në kërë vend filloi ndërtimi i HEC në 2014. Erdha këtu me dokumente, po këta e kishin zënë" Sipas një dokumenti, i datës 3 prill 2018, Hipoteka e Sarandës i ka dërguar një shkresë Bistrica 3, ku ndër të tjera i thotë se "ky objekt është pasqyruar gabim në kartelën e pasurisë". Ndërkohë, po në këtë dokument, hipoteka e Sarandës pretendon se do të vijojë me korrigjimin e objektit në kartelë. Hipoteka megjithëse e pranon vetë se ka bërë një gabim, në vendosjen e HEC Bistrica 3, ende nuk e ka rregulluar këtë gabim! Ndërtimi i HEC Bistrica 3 ka sjell që prona e z.Kosta Kaishi dhe prona e HEC-it të mbivendosen.