Asambleja Kombëtare e entitetit serb të Bosnje-Hercegovinës, Republikës Sërpska, do të mbajë një seancë në fillim të korrikut, për të ratifikuar Deklaratën e “Kuvendit gjithëserb”, të firmosur më 8 qershor. Kështu tha kryetari i Asamblesë, Nenad Stevandic. “Kuvendi gjithëserb” u mbajt të shtunën në Beograd. Gjatë takimit, Qeveria e Serbisë dhe ajo e Republikës Sërpska, nënshkruan Deklaratën për mbrojtje të të drejtave kombëtare dhe politike dhe për të ardhmen e përbashkët të popullit serb. Presidenti serb, Aleksandar Vuçiç,tha se dokumenti i referohet Marrëveshjes së Dejtonit, që i dha fund luftës në Bosnje, dhe nuk përmend përçarjet aty. Ky dokument duhet të miratohet nga parlamentet e dy palëve brenda 90 ditëve. Stevandiç i ka thënë Radiotelevizionit Serb, të dielën, se dokumenti i miratuar nuk ka të bëjë me ndonjë “Serbi të madhe”, por me mbrojtjen e të drejtave të serbëve në të gjitha vendet. Në eventin e të dielës morën pjesë edhe pjesëtarë të Listës Serbe, partisë më të madhe të serbëve në Kosovë, e cila gëzon mbështetjen e Beogradit zyrtar. Presidenti serb tha se ky dokument përmend edhe Kosovën edhe Rezolutën 1244. “E kemi përmendur qartë edhe dialogun si rrugë thelbësore për zgjidhje të problemeve mes nesh dhe shqiptarëve. Nuk ka zgjidhje tjetër përveç dialogut”, tha ai. Në deklaratë thuhet se kosova “është pjesë e patjetërsueshme e Serbisë”, dhe se Kuvendi gjithëserb mbështet përpjekjet e Republikës së Serbisë për ruajtjen e integritetit territorial dhe sovranitetit, të garantuar me ligjin ndërkombëtar, Rezolutën 1244 dhe rezolutat tjera të Këshillit të Sigurimit të Kombeve të Bashkuara.