Kryeministri Edi Rama mohoi se në fund të fjalës së mbajtur në Kuvend gjatë mocionit me debat të kërkuar nga opozita të ketë paralajmëruar ndonjë non grata tjetër. Ai thotë se deklarata e tij ka qenë për të ilustruar se politika amerikane nuk është muhabet leku, gjize dhe byreku. “Nuk kam paralajmëruar asnjë nongrata! Thjesht kam kujtuar se politika e amerikane nuk është muhabet leku, gjize dhe byreku siç e bëjnë nongratat e Tiranës, po qasje strategjike që as varet as ndryshon nga retë në pantallonat e gjelave të katundit tonë politik!”, shkruan Rama. Gjatë seancës së të enjtes, Rama sfidoi opozitën duke i thënë se e pret që ta mundë më 14 maj, por deri atëherë i sugjeroi të bëjë kujdes nga byrektorja, duke iu referuar Departamentit të Shtetit. “Gjiza ka arritur, tha ai, dhe okllaia po shtron brumin tjetër për tavën që pret të hyjë në furrën e rindezur. Personin në fjalë do ta shihni vetë, mbylli Rama deklaratën.