Mes 100 vendeve nga e gjithë bota, qyteti i Belshit fitoi në panairin ndërkombëtar të Turizmit në Berlin çmimin e dytë si destinacion i turizmit të gjelbër. Kryeministri Edi Rama në një postim në facebook përgëzoi për rritjen turistike të qytetit, kryebashkiakun Arif Tafani. Rama: “Belshi i Rilindur nga ferrat e plehrat ku e gjetëm kur morëm detyrën, fitoi dje Çmimin e Dytë si destinacion i Turizmit të Gjelbër, mes 100 vendeve të përzgjedhura nga e gjithë bota, në Panairin Ndërkombëtar të Turizmit ITB Berlin. Një super bravo kryetarit të bashkisë Arif Tafani, ekipit simpatik të Bashkisë Belsh, sipërmarrësve të vegjël të Belshit që me investimet e tyre në hoteleri e shërbime po tërheqin gjithnjë e më shumë turistë, si edhe komunitetit të mirë e mikpritës belshiot.” – shprehet Rama në Facebook. Në edicionin e këtij viti Shqipëria mori pjesë me një koncept të ri të promovimit, me një ekip prej 26 turoperatorësh dhe 7 bashkish turistike që prezantuan nën sloganin “Albania All Senses” potencialet, atraksionet dhe tregun shqiptar të turizmit. Gjithashtu u firmos marrëveshja e organizimit të mbledhjes së 70-të të Komisionit për Evropën të Organizatës Botërore të Turizmit në Tiranë, në datat 7-9 prill.