Koreja e Veriut lëshoi disa raketa balistike me rreze të shkurtër veprimi të mërkurën drejt bregut të saj lindor, thanë Koreja e Jugut dhe Japonia, disa ditë pasi Pheniani zbuloi një objekt të pasurimit të uraniumit dhe u zotua të rrisë arsenalin e tij bërthamor. Raketat u lëshuan nga Kaechon, në veri të kryeqytetit Penian rreth orës 6:50 të mëngjesit në një drejtim verilindor dhe fluturuan për rreth 400 km, tha Shefi i Shtabit të Përbashkët të Koresë së Jugut, pa saktësuar se sa raketa u lëshuan dhe se ku kishin rënë ato.“Ne e dënojmë fuqishëm lëshimin e raketave të Koresë së Veriut si një provokim të qartë që kërcënon seriozisht paqen dhe stabilitetin e gadishullit Korean”, tha shtabi në një deklaratë, duke u zotuar se do të përgjigjet ndaj çdo provokimi të mëtejshëm. Rreth 30 minuta pas njoftimit të parë për lëshimin e raketave, roja bregdetare e Japonisë tha se Koreja e Veriut lëshoi një tjetër raketë balistike. Ministri japonez i Mbrojtjes, Minoru Kihara tha se të paktën një nga raketat ra pranë bregut lindor të Koresë së veriut dhe se lëshimet "nuk mund të tolerohen". Komanda e Amerikane e Indo-Paqësorit tha në X se ishte në dijeni të testimit dhe se ishte konsultuar me Seulin dhe Tokion. Koreja e Veriut lëshoi disa raketa balistike me rreze të shkurtër veprimi edhe të enjten e kaluar, lëshimi i parë i tillë në më shumë se dy muaj, që më vonë e përshkroi si testim të një sistemi të ri lëshimi të shumëfishtë raketash. Zyrtarët koreanojugorë besojnë se prova e fundit mund të jetë një testim i armëve që do të eksportohen për në Rusi, në kuadër të bashkëpunimit të shtuar ushtarak mes dy vendeve.