Edhe qytetarë të ardhur nga vende të tjera shkelin rregullat e qarkullimit rrugor. Të tilla kanë qenë rastet kur policia ka ndaluar mjete që ecnin në rrugën interurbane Tiranë-Elbasan me shpejtësi nga 166 në 200 km në orë. Dy drejtues mjetesh nga maqedonia e veriut u konstatuan duke qarkulluar me shpejtësi 166 km në orë ndërsa një shtetas nga kosova po e drejtonte mjetin e tij me shpejtësi 200 km në orë. Ndërkohë që një shtetas shqiptar, por rezident në gjermani, u ndalua në rrugën Fier-Vlorë, ku po e drejtonte mjetin me 186 km në orë. Të gjitha këto detaje vijnë nga raportimi më i fundit i policisë rrugore, e cila po vijon kontrollet në rrugët e vendit për të evidentuar dhe ndëshkuar shkelësit e kodit rrugor, me qëllim parandalimin e aksidenteve. Në këtë kuadër, është parandaluar sipas raportit edhe një aksident rrugor, pasi në laprakë u ndalua një 21 vjecar, i pa pajisur me leje drejtimi, që kryente manovra të rrezikshme duke terrorizuar kalimtarët. Ai u arrestua në kushtet e flagrancës për drejtim mjeti pa leje drejtimi dhe është ndëshkuar me gjobë për manovra të rrezikshme në rrugë. Por nuk mbaron me kaq, edhe 10 drejtues të tjerë mjetesh janë arrestuar në flagrancë, nga të cilët 6 për drejtim mjeti në gjendje të dehur dhe 4 për drejtim mjeti pa leje drejtimi. Policia njofton edhe se ka pezulluar 45 leje drejtimi dhe ka vendosur 2369 gjoba.