Dy cisterna kineze të ngarkuar me naftë dolën nga Ngushtica e Hormuzit të mërkurën, sipas të dhënave të transportit detar, duke ndezur shpresat se konflikti i SHBA-së dhe Izraelit me Iranin mund të zgjidhet së shpejti pas komenteve pozitive nga presidenti amerikan dhe zëvendësi i tij. Presidenti Donald Trump tha të martën se lufta do të mbaronte "shumë shpejt", ndërsa zëvendëspresidenti JD Vance foli për përparimin në bisedimet me Teheranin rreth një marrëveshjeje për t'i dhënë fund armiqësive. "Jemi në një pozicion mjaft të mirë", tha Vance në një konferencë për shtyp në Shtëpinë e Bardhë. Trump ndërkohë i bëri komentet e tij një ditë pasi tha se kishte ndaluar një rifillim të planifikuar të luftimeve pas një propozimi të ri nga Teherani për t'i dhënë fund konfliktit. "Isha një orë larg marrjes së vendimit për të rifilluar luftën sot", u tha Trump gazetarëve në Shtëpinë e Bardhë të martën. Udhëheqësit e Iranit po luten për një marrëveshje, shtoi ai, duke nënvizuar se një sulm i ri i SHBA-së do të ndodhte në ditët në vijim nëse nuk arrihej një marrëveshje. Shtetet e Bashkuara po stërmundohet që ti japë fund luftës që filloi bashkë me Izraelin gati tre muaj më parë. Trump ka thënë vazhdimisht gjatë konfliktit se një marrëveshje me Teheranin ishte afër e në të njëjtën kohë ka kërcënuar me sulme të rënda ndaj Iranit nëse nuk arrihet një marrëveshje. Presidenti amerikan është nën presion të fortë politik në vend për të arritur një marrëveshje që do të rihapte Ngushticën e Hormuzit, një rrugë kyçe për furnizimet globale të naftës dhe mallrave të tjera. Çmimet e naftës mbeten të larta dhe vlerësimi i miratimit të Trumpit ka rënë ndjeshëm me zgjedhjet e Kongresit që po afrohen në nëntor.