Presidenti Ilir Meta ka kthyer një tjetër ligj në Kuvend, duke mos dekretuar ligjin për prokurimin publik. Në argumentim e kthimit të këtij ligji Presidenti thekson se ai është në kundërshtim me parimet dhe dispozitat kushtetuese që mbrojnë sigurinë juridike. Sipas konkluzioneve të kreut të shtetit ky ligj bie ndesh me parimet e mbrojtura nga Kushtetuta e Republikës së Shqipërisë, duke krijuar pabarazi në trajtimin e operatorëve ekonomikë, diskriminim të tyre, dhe duke i penguar të ushtrojnë të drejtën për liri të veprimtarisë ekonomike, edhe në raport me mundësinë e hyrjes në marrëdhënie kontraktuale me autoritetet kontraktore, krijon mundësi për shpërdorim të fondeve publike. Parashikimet e ligjit, sipas presidentit lënë hapësira për zbatime selektive në praktikë të rregullimeve, çojnë në deformimin e konkurrencës së lirë mes operatorëve ekonomikë potencialë për pjesëmarrje në procedurat e prokurimit.