Kryeministri Edi Rama përdori një gjuhë të ashpër dhe vendosi pikat mbi ‘i’ në takimin e zhvilluar me kryebashkiakët e vendit këtë të premte. Duke ju referuar raportit vjetor të Agjencisë së Prokurimit Publik, Rama ka treguar problemet e mëdha që janë evidentuar në mënyrën e menazhimit të tenderave nga ana e Bashkive të Vendit. Duke cituar këtë raport, Rama u përqëndrua te pjesa kritike ndaj bashkive, që nga mosadresimi i rekomandimeve të Agjencisë së Prokurimit Publik e deri te problematikat e tjera me tenderat, si mungesa e garës, apo qepja e kritereve për të paracaktuar fituesin. Ndërkohë referuar po të njëjtit raport, shkruhet e zeza mbi të bardhë se edhe ministritë reflektojnë probleme të mëdha përsa i përket abuzimit me tenderat apo edhe moszbatimit të sugjerimeve të Agjencisë së Prokurimeve Publike. Agjencia e Prokurimit Publik thotë se në gjatë vitit 2020 ka gjetur probleme në institucionet qendrore, të pavarura dhe në varësi të Qeverisë. Konkretisht 71 për qind e procedurave të prokurimit publik të asistuara teknikisht prej agjencisë kanë rezultuar me probleme. Në raport nuk ngelen pa përmendur edhe shoqëritë anonime me kapital shtetëror, të tilla si KESH dhe OSHEE, apo të tjera kompani me këtë statusi. Në 80 për qind e raste të asistuara nga agjencia janë evdientuar probleme serioze me proceset e tenderimit.