Olsi Meta ndryshoi disa herë emrin dhe mbiemrin e tij në përpjekje për të humbur gjurmët dhe fshirë të shkuarën e tij si i arrestuar dhe dënuar në Itali për trafik ndërkombëtar droge. Dosjet kriminale ndaj tij nisin në Itali të paktën që prej vitit 2010, kohë kur ishte 30 vjeç. Në atë kohë, mediat italiane raportuar për një aksion të ndërmarrë ndaj një grupi të strukturuar kriminal me aktivitet kryesor trafikun e drogës në Itali dhe Europë. Hetimet italiane zbuluan mes të tjerëve se pjesë e këtij grupi ishte edhe Olsi Meta, njohur tashmë nga autoritetet shqiptare si Kristjan Koni, kishte lidhje edhe me klane të Camorra-s napoletane. Prokurorët italianë provuan se organizata tij importonte marijuanë e kokainë nga Spanja, Holanda dhe Shqipëria, të cilat i dërgonin më pas në Itali. Olsi Meta konsiderohej nga autoritetevt italiane si koka e organizatës, që e drejtonte nga Bolonja, një qytet strategjik për shpërndarjen e lëndëve narkotike në qytete të ndryshme të Italisë. Nga ky aktivitet dyshohet se është vënë edhe pasuria marrëmendëse e Olsi Metës, ku siç njoftoi policia dhe prokuroria një ditë më parë, bëhet fjalë për prona dhe llogari bankare me vlerë mbi 26 milionë euro në total.