Zëdhënësi i sigurisë kombëtare në Shtetet e Bashkuara të Amerikës, John Kirby ngriti shqetësimin se Rusia po dërgon një grup negociator në Korenë e Veriut, për të ofruar ushqim në këmbim të armëve dhe municioneve. Ai tha se çdo marrëveshje armësh mes Rusisë dhe Koresë së Veriut, është në shkelje të rezolutës së Këshillit të SIgurisë, në Organizatën e Kombeve të Bashkuara. Kirby ka akuzuar edhe më parë Phenianin zyrtar, se po furnizon me municione Rusinë dhe grupin e luftëtarëve mercenarë “Wagner”, por Koreja e Veriut ka mbajtur qëndrim kundërshtues. Zyrtari amerikan tha se ShBA-të po monitorojnë me kujdes situatën, ndërsa Zyra e Thesarit futi në listë të zezë një sllovak, që dyshohet se ishte ndërmjetësi I negociatave mes Rusisë dhe Koresë së Veriut. Ata thanë se shtetasi Ashot Mkrtychev, 56 vjeç, kishte rregulluar marrëveshje tregtare, që do t'i mundësonin Koresë së Veriut të dërgonte armë në Rusi në fund të 2022 dhe në fillim të 2023. Përfshirja në listën e zezë të sanksioneve do të thotë se asetet e Mkrtychev në SHBA ngrijnë, ndërsa bizneset amerikane nuk mund të bëjnë më tregti me të. Pamjet: AFP