Rrugët e hyrjes dhe daljes nga Lezha kanë qenë më shumë se kurrë nën survejimin e rreptë të Policisë Rrugore. E konsideruar si një nga zonat e nxehta dhe me një numër të lartë aksidentesh, në shumicën e rasteve edhe me fatalitete, rrugorët janë hedhur në sulm. Përmes një njoftimi zyrtar, Policia Rrugore e Lezhës përmes bën me dije se gjatë një jave, 10 drejtues mjetesh janë vënë në pranga dhe 29 të tjerë janë proceduar penalisht për shkelje të ndryshme që përbëjnë rrezik potencial për përfshirje në ngjarje rrugore me pasojë jetën. Po gjatë kësaj jave janë vendosur qindra masa administrative, për drejtim mjeti nën efektin e alkoolit, për parakalime të gabuara, për tejkalim të normave të lejuara të shpejtësisë, për mos përdorim të rripit të sigurimit dhe për përdorim të celularit në timon. Efektivët e policisë kanë intensifikuar kontrollet me radar dhe drager, për ndëshkimin e atyre drejtuesve të mjeteve që drejtojnë mjetin nën efektin e alkoolit dhe tej normave të lejuara të shpejtësisë. Si rezultat i këtyre kontrolleve, janë tërhequr 11 leje drejtimi për përdorim të pijeve alkoolike, 20 leje drejtimi për tejkalim të normave të lejuara të shpejtësisë, si dhe janë vendosur 180 masa administrative për parakalime të gabuara apo manovra të rrezikshme. Po gjatë këtyre kontrolleve janë shoqëruar për verifikim në Komisariatet e Policisë Kurbin dhe Lezhë, 7 shtetas. Është bërë bllokimi i 11 mjeteve, për mungesë dokumentacioni, si dhe për qarkullim me masaadministrative të pashlyera. Materialet procedurale do t’i referohen Prokurorisë, për veprime të mëtejshme