Aeroplanmbajtësja më e madhe në botë, USS Gerald Ford, ka lundruar drejt Oslos të mërkurën, në udhëtimin e parë për një anije të tillë amerikane, me qëllim demonstrimin e forcës së NATO-s në një kohë tensionesh të shtuara mes aleancës dhe Rusisë për luftën në Ukrainë. Luftanija dhe ekuipazhi i saj do të kryejnë stërvitje me forcat e armatosura të Norvegjisë përgjatë brigjeve të vendit, në ditët në vijim – tha ushtria norvegjeze. “Vizita është një sinjal i rëndësishëm i marrëdhënies së ngushtë dypalëshe mes SHBA-së dhe Norvegjisë dhe një sinjal i besueshmërisë së mbrojtjes kolektive”, tha Xhoni Karlsen, një zëdhënës i shtabit të përgjithshëm norvegjez. Mediat vendase raportuan se aeroplanmbajtësja do të lundrojë në veri të qarkut arktik por zëdhënësi refuzoi të komentonte raportet. Ambasada ruse në Oslo dënoi ndërkohë ndalesën në norvegji të aeroplanmbajtëses. “Nuk ka asnjë cështje në veri që kërkon zgjidhje ushtarake...nuk ka as edhe një temë ku ndërhyrja nga jashtë është e nevojshme”, tha ambasada në një postim në facebook. “Duke marrë parasysh se është i pranuar gjerësisht në oslo fakti se Rusia nuk përbën kërcënim direkt ushtarak për vendin, një demonstrim i tillë force duket jo logjik dhe i dëmshëm”. Norvegjia, anëtare e NATO-s, ndan një kufi me rusinë në arktik dhe vitin e shkuar u bë furnizuesja më e madhe me gaz e evropës pas ndalimit të rrjedhës nga rusia. Ushtria norvegjeze dhe aleatët e natos kanë patrulluar pranë platformave në det të naftës dhe gazit që nga vjeshta, pas shpërthimeve në tubacionet e nënujshme të Nord Stream-it në detin Baltik.