Sezoni veror në Durrës dhe Golem po zhvillohet me dy drejtime të ndryshme. Nga njëra anë, hotelet po mbushen falë kontratave me agjencitë turistike dhe grupeve të organizuara, ndërsa nga ana tjetër rezervimet individuale dhe ato të minutës së fundit kanë shënuar rënie të ndjeshme. Operatorët turistikë raportojnë se kërkesa u dobësua në fund të qershorit dhe në fillim të korrikut. Ndërkohë, tregu gjerman ka sjellë më pak turistë sesa ishte parashikuar, ndërsa polakët, çekët dhe sllovakët vijojnë të mbajnë peshën kryesore të turizmit të organizuar. Këtë sezon është rritur edhe interesi nga Franca, Britania e Madhe dhe Armenia, të cilat po konsiderohen tregje të reja për bregdetin shqiptar. Për shkak të kërkesës më të dobët, shumë hotele në Durrës dhe Golem kanë nxjerrë oferta dhe kanë ulur çmimet, edhe pse korriku dhe gushti janë zakonisht muajt me tarifat më të larta. Megjithatë, sipas revistës Monitor, operatorët mbeten optimistë se shtatori dhe tetori mund të kompensojnë pjesërisht ecurinë më të dobët të korrikut, pasi rezervimet për këta muaj paraqiten më të mira.