Jeff Bezos do ti japë NASA-s 2 miliardë dollarë në përpjekje për të rindezur betejën e hapësirës mes kompanisë së tij Blue Origin dhe Space X të Elon Musk. Njeriu më i pasur i botës i bëri apel administratorit të NASA-s Bill Nelson, në një letër të hapur duke ofruar që të mbulojë miliarda dollarë kosto të agjencisë hapësinore amerikane. Duke bërë këtë, Bezos shpreson se Blue Origin do të mund të rimerret në konsideratë për një kontratë për të ndërtuar mjetin që do të cojë astronautët e radhës në hënë. Propozimi i tij i pazakontë vjen pak muaj pasi NASA zgjodhi SpaceX, duke lënë mënjanë Blue Origin, për një kontratë 2.9 miliardë dollarëshe për të ndërtuar mjetin. Agjencia fillimisht kishte si qëllim të siguronte të paktën dy kompani nga sektori privat për të ndërtuar anijen hapësinore që do të dërgonte astronautët në sipërfaqen e hënës për misionet e uljes në hënë Artemis. Por në prill, NASA dha njoftimin surprizë se do të vijonte përpara me SpaceX si kontraktor të vetëm për projektin duke përmendur kostot si shkak kryesor. Blue Origin nuk reagoi ndaj vendimit. Por tani Bezos, i sapodalë nga fluturimi hapësinor javën e shkuar, do të sigurohet që paratë të mos jenë problem.