Ish-kryeministri Sali Berisha, është shndërruar në mollë sherri në Komisionin Hetimor për TIMS. Kryetari i këtij Komisioni Ervin Salianji, solli në seancë planin hetimor, së bashku me emrat e disa prej personave që u propozuan në mbledhjen e kaluar për të dëshmuar, mes të cilëve nga maxhoranca u propozua edhe emri i Berishës. Por, për deputeten propozuese Blerina Gjylameti, fjala e saj ka qenë ironike, duke u tërhequr nga kjo kërkesë, që mund të nxirrte Berishën nga banesa ku ndodhet në arrest shtëpie. Ndërkohë Sekretari Toni Gogu, akuzoi Salianjin se po tenton të bëhet gjyqtar i Berishës, për ta nxjerrë atë nga banesa, teksa nuk munguan akuzat për falsifikim procesverbali. Gjylameti: Ironinë mos e shit si shpëtimtar dhe kalorës të pafajësisë. Duhet të kuptojmë se cilët janë përgjegjës për prekjen e sistemit TIMS. Duhet të vijë nga plani i hetimit. Nëse keni për të thirrur dëshmitarë, thirrini. Ju thatë se mund të thërrisni dhe Mehmet Shehun dhe Koci Xoxen. Pse s’i vutë emrat atje? Ironia është e njëjtë.