Ish kryeministri Sali Berisha nuk i ndali akuzat ndaj kreut të qeverisë as këtë të martë, teksa ishte në një takim me eksperët e fushës së energjetikës dhe hidrokarbureve, për të folur rreth rritjes së çmimit të naftës, por edhe për planin e qeverisë për të rritur çmimin e energjisë elektrike. Berisha hodhi akuza ndaj kryetarit të Partisë Socialiste Edi Rama, se ai është i përfshirë në kontrabandën e naftës, që u kap pak ditë më parë në portin e Durrësit. Sipas tij, Rama takohet vazhdimisht me një pronar peshkarexhe për kontrabandë nafte. “ Nafta nuk është kokainë që futet në arka bananesh, është i njohur zinxhiri. Ka pronarë të peshkarexhave. Një prej tyre bën vetëm kontrabandë nafte, që i shkarkon lirshëm dhe që thuhet se takohet periodikisht me kryeministrin. Nuk mund të ketë kontrabandë nafte pa një mbulesë të plotë të qeverisë. Ky të duket ndonjëherë se ka mendësinë e Shqipërisë pa vetura”.