Sali Berisha ka hedhur të shtunën akuza ndaj kreut të Partisë Demokratike, Lulzim Basha duke thënë se ai nuk udhëtonte dot në SHBA, derisa përjashtoi vetë atë nga Grupi Parlamentar. Duke folur nga Vlora, ku bashkëbisedoi me disa demokratë, Berisha akuzoi sërish Bashën për humbjet e PD dhe e quajti të marrë peng nga Rama që ka asgjësuar pluralizmin në vend. Ish-kryeministri Sali Berisha pranon se ka përgjegjësi individuale që nuk ndërmori nismën që në 2017 për të larguar Bashën nga kryetar të PD. Ai thotë se në atë vit pas humbjes së zgjedhjeve i kërkoi dhënien e dorëheqjen,por Basha nuk pranoi. Ish-kryeministri ka pasur në krah sot gjatë takimit në Vlorë edhe një shqiptaro-amerikane, të cilën e prezantoi si eksponent të Partisë Republikane amerikane. Edi Kokalari është një avokate e vlerave konservatore. Vetë Kokalari tha se zoti Berisha ka disa detyra përpara, një prej tyre ta kthejë PD-në në vitin 1991 dhe ta rindërtojë me parimet e Partisë Republikane amerikane. Para demokratëve të Vlorës, ai ka lënë të hapur mundësinë që të rikthehet kryetar i PD. Berisha thekson se kur u largua, kishte vendosur të mos kthehej më kurrë, por në rrethanat që ndodhet PD të zgjojnë dhe nga varri po të jesh, sipas ish-kryeministrit.