Kryeministri i Kosovës, Albin Kurti, tha të hënën se sulmin “paramilitar dhe terrorist”, ndaj Policisë së Kosovës në veri të vendit e kreu “Klani i Novi Sadit i udhëhequr nga ministri i Mbrojtjes i Serbisë, Millosh Vuçeviç”. “Para dy dekadave në Serbi sundonte Klani i Zemunit, kurse tash vendin atij ia ka zënë Klani i Novi Sadit. Kriminelë në luftë, kriminelë në paqe; kriminelë në Serbi, kriminelë në Kosovë. Presidenti i vendit, Aleksandar Vuçiç, si një capo-di-tutti-capi, ndodhet aty për të dëshmuar që ndonëse krimi dikton shtetin, në fakt, është shteti që dikton krimin”, shkroi Kurti në Facebook të hënën. Drejtori i Përgjithshëm i Policisë së Kosovës, Gazmend Hoxha, kishte deklaruar më 1 tetor se gjatë operacionit “brenda manastirit u gjetën 49 persona civilë, 43 pelegrinë dhe gjashtë pjesëtarë të personelit dhe asnjë prej tyre nuk ishte dëmtuar dhe as keqtrajtuar. Duke folur për këtë të hënën, Kurti tha se “rreth 40 pelegrinë ortodoksë në Manastirin e Banjskës, me 24 shtator ishin nga Novi Sadi. “Ndoshta e rastësishme por hetimet do të tregojnë gjithcka”, thekson ai. Kurti ndërkohë, thotë se grupi terrorist në arrati, i udhëhequr nga Millan Radoiçiç, po qëndron sot në Rashkë. Beogradi u ka dhënë atyre makina skoda oktavia me targa të Beogradit dhe Nishit.Sidoqoftë, KUrti thotë se në katër komunat në veri të kosovës, terrori, kriminaliteti dhe dhuna e paramilitarëve po merr fund. “Kosova nuk ka jurisdiksion në Serbi. A nuk do të duhej që BE-ja dhe ShBA-të ta formojnë një Gjykatë Speciale për Klanin e Novi Sadit? Mafia ballkanike do të përjetonte goditje fatale, ndërkaq rajoni i Ballkanit do të hapej i tëri për demokraci evropiane, drejtësi ligjore, paqe të qëndrueshme dhe zhvillim të përshpejtuar”, përfundon Kurti.