Një baba mbeti i tmerruar pasi u kthye në shtëpi për të gjetur tre fëmijët e tij të vrarë brutalisht me thikë. Ngjarja tragjike ndodhi në një shtëpi në qytetin malor Taninges në Alpet Franceze. Tre fëmijët, dy djem të moshës dy dhe 11 vjeç dhe një vajzë 13-vjeçare u gjetën të pajetë rreth orës 13 të së martës. Nëna e tyre, e konsideruar si një e dyshuar kryesore për vdekjen e fëmijëve, është zhdukur. Ajo besohet se ka ikur në male, në zonën përreth, raportojnë mediat franceze. Gruaja thuhet se ka lënë një letër para se të largohej por për momentin nuk dihet asnjë detaj se cfarë ka shkruar ajo. Policia francezë ka nisur një hetim dhe po kërkon për 45 vjecaren, me profesion mësuese, dhe në operacionet e kërkimit janë angazhuar edhe helikopterë dhe skuadra zhytësish. Vdekja e fëmijëve po hetohet si “vrasje me dashje”. Prokurorët lokalë thanë se të dhënat paraprake kanë treguar se "viktimat kishin plagë me thikë" ndërsa autopsia dhe vlerësimet shtesë të ekspertëve do të mësohen më vonë.