Një avion mallrash rrëshqiti nga një pistë në Aeroportin Ndërkombëtar të Hong Kongut dhe ra në det mëngjesin e të hënës, duke i marrë jetën dy anëtarëve të stafit në tokë. Fluturimi EK9788 i Emirates po mbërrinte nga Dubai rreth orës 03:50 sipas orës lokale kur doli nga pista dhe u përplas me një automjet patrullimi të aeroportit. Dy personat që ishin brenda automjetit vdiqën, ndërsa katër anëtarët e ekuipazhit në bordin e avionit mbijetuan. Ky shënon një nga incidentet më vdekjeprurëse të aviacionit në Hong Kong ndër vite pasi aeroporti i qytetit ka një rekord të mirë sigurie. Autoritetet kanë nisur një hetim pasi mbeten ende shumë pikëpyetje në lidhje me rrugën që ndoqi avioni pas uljes. Zyrtarët e aeroportit kanë thënë se i dhanë udhëzimet e sakta pilotëve dhe se kishte shenja në pistë për të drejtuar avionët. Drejtori ekzekutiv i operacioneve të aeroportit tha se makina e patrullimit, në atë kohë, po udhëtonte në një rrugë jashtë pistës "në një distancë të sigurt prej saj". Avioni papritur doli nga pista, u përplas me gardhin dhe me automjetin, duke e shtyrë atë në det”, shpjegoi drejtori duke sqaruar se pilotët nuk kishin raportuar asnjë problem me avionin kur ai po ulej. Zhytësit arritën të gjenin trupat e shoferit dhe pasagjerit të automjetit në det. Të dy ata ishin të moshës 30 dhe 41 vjeç. Anëtarët e ekuipazhit në bord kishin reaguar shpejt dhe u shpëtuan nga skuadrat e emergjencave që mbërritën në vendngjarje. Një zyrtar i policisë tha ndërkohë se një hetim ka nisur tashmë.